Y Bwletin Wythnosol
|
Gwasanaeth Esgobaeth Llandaf + Deoniaeth Caerdydd
EGLWYS DEWI SANT www.eglwysdewisant.org.uk CROESO i Eglwys Dewi Sant ar yr Aelwyd 31 Mai 2020 Y Sulgwyn Ni allwn gwrdd i gyd-addoli ar y Sul – ond fe allwn ni addoli ar y cyd, pob un yn ei gartref ei hun.
Byddaf innau hefyd oherwydd y cyfyngiadau teithio yn addoli ar yr aelwyd a hynny am 8.00am, 10.30am a 6.00pm yn ôl fy arfer ar y Sul, gan offrymu mawl yr eglwys i Dduw, a’ch cofio chi oll yn fy ngweddïau, fel y gofynnaf i chi, yn garedig, weddïo drosof fi. Mae’r Salm a’r darlleniadau ar gyfer y Sul fel y canlyn: Y Foreol Weddi: Salm 104:24-36 Actau 2:2-21 Ioan 20:19-23 Yr Hwyrol Weddi: Salm 98 Genesis 11:1-9 Actau 10:34-48 Cyhoeddiadau ar gyfer y Sul
CYNGOR PLWYFOL EGLWYSIG Cynhelir cyfarfod rhithiol o’r Cyngor Plwyfol Eglwys nos Lun 8 Mehefin am 7.00pm. Bydd manylion am y cyfarfod yn cael eu hanfon at aelodau’r Cyngor yn nes at y dyddiad. MATERION ARIANNOL Diolch i bawb sydd wedi ymateb i’r alwad am gyfrannu’n ariannol i’r eglwys er nad ydym yn gallu cyfarfod yn yr eglwys. Os nad ydych wedi cael cyfle, ac os hoffech chi wneud cyfraniad a wnewch chi gysylltu â Rhys Jones y trysorydd i drafod y gwahanol opsiynau. Ffôn: 029 2056 3834 Symudol: 07794897328 E-bost: rhys.helen.jones@btinternet.com DIOLCH Hoffai Susan Thomas ddiolch i bawb a anfonodd gyfarchion pen blwydd ati yn ddiweddar. CLOCH DEWI Os hoffech gyfrannu deunydd i’r rhifyn nesaf o Gloch Dewi, anfonwch eich cyfraniadau erbyn dydd Gwener 26 Mehefin at Wyn Mears: wyn@wynmears.com. CODI ARIAN “ACTION FOR ME” Mae Angharad Bottomley sy’n mynd i eglwys Tonyrefail, ond sy’n dod i EDS yn achlysuro i’r gwasanaethau hwyrol yn mynd i eillio gwallt ei phen ddydd Mawrth 2 Mehefin i godi arian tuag at yr elusen “Action for ME”. Os hoffech ragor o wybodaeth neu gyfrannu ewch i: https://www.justgiving.com/fundraising/cartref-azzie GWASANAETHAU HEDDIW: Y SULGWYN Bydd linc i bodlediad y gwasanaeth boreol yn ymddangos gyda’r e-bost â’r daflen hon. Hefyd mae modd ymweld â gwefan yr eglwys i ddod o hyd i’n gwasanaethau ar lein. Bydd podlediad o’r Hwyrol Weddi am 6pm heno yn ôl yr arfer. Bydd y linc yn cael ei anfon allan yn hwyrach yn y prynhawn. YN EIN GWEDDÏAU Cofiwn yn ein gweddïau y cleifion: John Hicks, Margaret Jones, Gwyneth Lewis, Sally Lewis, Dawn Miller, Catrin Morgan, Nia Roberts, Ceri Saunders, Dawn Parry Sawdon, Gwen Thomas, Jack Thomas (Offeiriad), Joan Thomas, ac am bawb sy’n gofalu amdanynt. Gweddïwn hefyd dros bawb a fu farw yn nhangnefedd Crist, a thros bawb y cofiwn am eu marwolaeth yr adeg hon o’r flwyddyn. Dyro iddynt, O Arglwydd, orffwys tragwyddol a llewyrched goleuni gwastadol arnynt. HENO AM 7.00pm
COVID 19 – Galwad Cenedlaethol o Weddi a Gweithredu “Bwriwch eich holl bryder arno ef, oherwydd y mae gofal ganddo amdanoch”. I Pedr 5:7 Mae Cytûn yn galw ar holl Gristnogion Cymru i ymuno mewn Gweddi am 7 o’r gloch pob nos Sul yn ystod yr argyfwng hwn; gofynnir i bawb weddïo dros:
Dduw ein Tad nefol, tydi a’n gwnaeth ac nid ni ein hunain; dy blant di ydym a defaid dy borfa. Dibynnwn arnat ti am bob peth; ynot ti yr ydym yn byw, yn symud ac yn bod. Derbyn ein diolch am dy haelioni tuag atom; a chymer ni i’th ofal; er mwyn Iesu Grist ein Harglwydd. Amen. Gras ein Harglwydd Iesu Grist, a chariad Duw a chymdeithas yr Ysbryd Glân a fyddo gyda ni oll byth bythoedd. Amen. GWEDDÏAU’R SUL
Yn ein gweddïau heddiw, gofynnir inni weddïo dros:
Dydd Llun 1 Mehefin: Ymweliad Mair Forwyn Fendigaid ag Elisabeth
Seffaneia 3:14-18; Salm 113; Luc 1:39-49 Gweddïwn dros: Nebraska (yr Eglwys Esgobol), y Parchedicaf Scott Barker Bywoliaeth Rheithorol Dwyrain Morgannwg, y Parchedig Ganon Martyn Davies (Rheithor Tîm), y Parchedig David Morris (Ficer Tîm), y Parchedig Angel Cooper (Curad) Ysgol Gynradd yr Eglwys yng Nghymru Pendeulwyn, y pennaeth Paul Vaughan, y staff a’r disgyblion Ysgol Gynradd yr Eglwys yng Nghymru Llanbedr-y-fro, y pennaeth Owen Turner, y staff a’r disgyblion Ysgol Gynradd yr Eglwys yng Nghymru St Nicolas, y pennaeth, Rachel Evans, y staff a’r disgyblion Dydd Mawrth 2 Mehefin: Blandina a’i Chymdeithion (177), Merthyron II Pedr 3:11-18; Salm 90; Marc 12:13-17 Gweddïwn dros: Nelson (Aotearora Seland Newydd a Polynesia) Bywoliaeth Reithorol y Pont-faen, y Parchedigion Stephen Adams (Rheithor), Victoria Ashley (Ficer Tîm), Ian Yemm (darpar-gurad) Dydd Mercher 3 Mehefin: Iago Hannington (1885), Esgob, Cenhadwr a Merthyr; Merthyron Wganda (1886), a Janani Luwum (1977), Esgob a Merthyr II Timotheus 1:1-12; Salm 123; Marc 12:18-27 Gweddïwn dros: Nevada (yr Eglwys Esgobol), y Gwir Barchedig Dan Edwards Caplaniaid y Prifysgolion, y Parchedig Paul Fitzpatrick (Prifysgol Metropolitan Caerdydd), y Parchedig David Sheen (Prifysgol Caerdydd) Dydd Iau 4 Mehefin: II Timotheus 2:8-15; Salm 25; Marc 12:28-34 Gweddïwn dros: Busa Newydd (Nigeria), y Gwir Barchedig Israel Amoo Bywoliaeth Reithorol Arfordir Treftadaeth Morgannwg, y Parchedig Ganon Edwin Counsell (Rheithor), y Parchedigion Craig Vaughan (Ficer Tîm), Rhian Prime (Ficer Tîm), Marc Ashton Walford (Ficer Tîm), Jude Peters (Curad); Keith Brown, Sue Moll, Bill Henderson, Hazel Norfolk (Darllenwyr Lleyg) Dydd Gwener 5 Mehefin: Boniffas (754), Esgob, Cenhadwr a Merthyr II Timotheus 3:10-17; Salm 119:161 – 168; Marc 12:35-37 Gweddïwn dros: Ynysoedd Guinea Newydd (Papua Guinea Newydd), y Gwir Barchedig Dennis Kabekabe Archddiaconiaeth Morgannwg, yr Hybarch Christopher Smith Dydd Sadwrn 6 Mehefin: II Timotheus 4:1-8; Salm 71:8-17; Marc 12:38-44 Gweddïwn dros: New Hampshire (yr Eglwys Esgobol), y Gwir Barchedig Robert Hirschfeld Deoniaeth Cwm Cynon, y Deon Bro, y Parchedig Michael Jones |
Trefn Gwasanaeth ar gyfer
Tymor y Pasg Trefn gwasanaeth syml ar gyfer y Sulgwyn
“Anadlodd arnynt a dweud: Derbyniwch yr Ysbryd Glân”. “Y mae cariad Duw eisoes wedi dywallt yn ein calonnau trwy’r Ysbryd Glân y mae ef wedi ei roi i ni”. (Rhufeiniaid 5:5) Yn enw’r Tad, a’r Mab, a’r Ysbryd Glân. Amen. Dad nefol, y mae pob calon yn agored i ti. Ni allwn guddio un dim oddi wrthyt. Glanha ni â fflam dy Ysbryd Glân er mwyn inni dy garu a’th addoli’n ffyddlon, trwy Iesu Grist ein Harglwydd. Amen. Arglwydd, trugarha. Crist, trugarha. Arglwydd, trugarha Dad nefol, yr ydym wedi pechu ar feddwl, gair a gweithred, a heb wneud yr hyn a ddylem. Mae’n wir ddrwg gennym, ac yr ydym o ddifrif yn edifarhau. Er mwyn dy Fab Iesu Grist a fu farw drosom, Maddeua inni’r cwbl a aeth heibio ac arwain ni yn ei ffordd ef i gerdded fel plant y goleuni. Amen. Golched Duw ein hunanoldeb a’n pechod ymaith, llanwed ein calonnau â’i dangnefedd, a’n bywydau â’i glod: trwy Iesu Grist ein Hiachawdwr. Amen. Gogoniant yn y goruchaf i Dduw, ac ar y ddaear tangnefedd i’r rhai sydd wrth ei fodd. Moliannwn di, bendithiwn di, addolwn di, gogoneddwn di, diolchwn i ti am dy fawr ogoniant. Arglwydd Dduw, Frenin nefol, Dduw Dad Hollalluog. O Arglwydd, yr Unig Fab, Iesu Grist; O Arglwydd Dduw, Oen Duw, Fab y Tad, sy’n dwyn ymaith bechod y byd, trugarha wrthym; tydi sy’n eistedd ar ddeheulaw Duw Dad, derbyn ein gweddi. Oherwydd ti yn unig sy’n Sanctaidd; ti yn unig yw’r Arglwydd; ti yn unig, O Grist, gyda’r Ysbryd Glân, sydd Oruchaf yng ngogoniant Duw Dad. Amen. Colect y Sulgwyn O Dduw, a ddysgaist ar gyfenw i’r amser yma galonnau dy ffyddloniaid trwy anfon iddynt oleuni dy Ysbryd Glân: dyro i ni trwy’r un Ysbryd feddu barn gywir ym mhob peth, a llawenychu byth yn ei ddiddanwch gwynfydedig: trwy haeddiannau Iesu Crist ein Hiachawdwr, sy’n byw ac yn teyrnasu gyda thi, yn undod yr un Ysbryd, yn un Duw, yn oes oesoedd. Amen. Darlleniad o’r Hen Destament: Numeri 11:24-30 Aeth Moses ymaith a mynegi i'r bobl eiriau'r Arglwydd; yna casglodd ddeg a thrigain o henuriaid y bobl a'u gosod o amgylch y babell. Daeth yr Arglwydd i lawr mewn cwmwl, a llefaru wrtho, a chymerodd yr Arglwydd beth o'r ysbryd oedd arno ef a'i roi ar yr henuriaid, y deg a thrigain ohonynt; pan orffwysai'r ysbryd arnynt, byddent yn proffwydo, ond ni wnaent ragor na hynny. Arhosodd dau o'r dynion yn y gwersyll; eu henwau oedd Eldad a Medad, a gorffwysodd yr ysbryd arnynt hwythau. Yr oeddent hwy ymhlith y rhai a gofrestrwyd, ond am nad oedd-ent wedi mynd allan i'r babell, proffwydasant yn y gwersyll. Pan redodd llanc ifanc a mynegi i Moses fod Eldad a Medad yn proffwydo yn y gwersyll, dywedodd Josua fab Nun, a fu'n gweini ar Moses o'i ieuenctid, "Moses, f'arglwydd, rhwystra hwy." Ond dywedodd Moses wrtho, "Ai o'm hachos i yr wyt yn eiddigeddus? O na byddai holl bobl yr Arglwydd yn broffwydi, ac y byddai ef yn rhoi ei ysbryd arnynt!" Yna dychwelodd Moses a henuriaid Israel i'r gwersyll. Darlleniad o’r Testament Newydd: Actau 2:1-11 Ar ddydd cyflawni cyfnod y Pentecost yr oeddent oll ynghyd yn yr un lle, ac yn sydyn fe ddaeth o'r nef sŵn fel gwynt grymus yn rhuthro, ac fe lanwodd yr holl dŷ lle'r oeddent yn eistedd. Ymddangosodd iddynt dafodau fel o dân yn ymrannu ac yn eistedd un ar bob un ohonynt; a llanwyd hwy oll â'r Ysbryd Glân, a dechreusant lefaru â thafodau dieithr, fel yr oedd yr Ysbryd yn rhoi lleferydd iddynt. Yr oedd yn preswylio yn Jerwsalem Iddewon, pobl dduwiol o bob cenedl dan y nef; ac wrth glywed y sŵn hwn fe ymgasglodd tyrfa ohonynt, ac yr oeddent wedi drysu'n lân am fod pob un ohonynt yn eu clywed hwy yn siarad yn ei iaith ei hun. Yr oeddent yn synnu a rhyfeddu, ac meddent, "Onid Galileaid yw'r rhain oll sy'n llefaru? A sut yr ydym ni yn eu clywed bob un ohonom yn ei iaith ei hun, iaith ei fam? Parthiaid a Mediaid ac Elamitiaid, a thrigolion Mesopotamia, Jwdea a Capadocia, Pontus ac Asia, Phrygia a Pamffylia, yr Aifft a pharthau Libya tua Cyrene, a'r ymwelwyr o Rufain, yn Iddewon a phroselytiaid, Cretiaid ac Arabiaid, yr ydym yn eu clywed hwy yn llefaru yn ein hieithoedd ni am fawrion weithredoedd Duw." Anadla, anadl Iôr, Llanw fy mywyd i, Fel byddo ‘nghariad i a’m gwaith Yn un â’r eiddot ti. Anadla, anadl Iôr, Rho imi galon bur, A gwna f’ewyllys dan dy law Yn gadarn fel y dur. Yr Efengyl: Ioan 20: 19-23 Gyda'r nos ar y dydd cyntaf hwnnw o'r wythnos, yr oedd y drysau wedi eu cloi lle'r oedd y disgyblion, oherwydd eu bod yn ofni'r Iddewon. A dyma Iesu'n dod ac yn sefyll yn eu canol, ac yn dweud wrthynt, "Tangnefedd i chwi!" Wedi dweud hyn, dangosodd ei ddwylo a'i ystlys iddynt. Pan welsant yr Arglwydd, llawenychodd y disgyblion. Meddai Iesu wrthynt eilwaith, "Tangnefedd i chwi! Fel y mae'r Tad wedi fy anfon i, yr wyf fi hefyd yn eich anfon chwi." Ac wedi dweud hyn, anadlodd arnynt a dweud: "Derbyniwch yr Ysbryd Glân. Os maddeuwch bechodau rhywun, y maent wedi eu maddau; os peidiwch â'u maddau, y maent heb eu maddau." Dyma Efengyl yr Arglwydd. Moliant i ti, O Grist. Anadla, anadl Iôr, Meddianna fi yn lân, Nes gloywi fy naearol fryd  gwawl y dwyfol dân. Anadla, anadl Iôr, Nid ofnaf angau mwy, Caf fwy’n dragwyddol gyda thi Uwchlaw pob loes a chlwy’. Edwin Hatch – Cyf. Alun Davies Emynau’r Llan 118 Myfyrdod “Anadlodd Iesu arnynt a dweud: Derbyniwch yr Ysbryd Glân”. Ioan 20:22 Mae’n Sulgwyn, Sul y Pentecost. Heddiw yn yr eglwys cofiwn am yr Ysbryd Glân yn cael ei dywallt yn nerthol ar y disgyblion cyntaf. Yr Ysbryd Glân a ddaeth arnynt, yn ôl ein darlleniad o lyfr yr Actau, fel “gwynt grymus yn rhuthro” ac “ fel fflamau tân”. Yr Ysbryd Glân a ddaeth gan chwythu ymaith eu hofnau a’u hansicrwydd gan roi iddynt angerdd yn eu calonnau a thân yn eu boliau i fynd allan i’r byd a chyhoeddi “mawrion weithredoedd Duw”. Mae’r darlleniad o lyfr yr Actau yn cyfleu i’r dim y cyffro, a’r cynnwrf, a’r cythrwfl a ddaeth i fywyd y disgyblion ar y Sulgwyn cyntaf hwnnw. Doedd dim byd yn barchus, urddasol a sobr iawn am ddigwyddiadau’r Sulgwyn cyntaf. Fe gofiwn am i rai ymhlith y dorf luosog honno oedd wedi ymgynnull i ddathlu’r Pentecost yn Jerwsalem, honni mai wedi meddwi oedd y disgyblion. Mae T. H. Parry-Williams yn ei gwpled yn crynhoi i’r dim y cyffro, y cynnwrf a’r cythrwfl oedd ynghlwm â phrofiadau’r disgyblion cyntaf: “Gwarchod pawb! Dyma danchwa sy’n dod i’r byd Pan fo’r awel yn chwythu dynion a Duw ynghyd!” Ac eto, yng nghyffro, cynnwrf a chythrwfl y Sulgwyn cyntaf hwnnw, yn y “danchwa” o eiddo Duw, daeth yr eglwys Gristionogol i fodolaeth a chamodd allan i’r byd yn nerth a hyder ei hargyhoeddiad fod Iesu Grist, yr un a fu farw, yr un a atgyfodwyd, yr un a esgynnwyd i’r nef, yn Fab Duw, yn Arglwydd ac yn Waredwr. Ac felly heddiw, dathlwn ben blwydd yr eglwys, dathlwn ddechrau ei bywyd, ei gweinidogaeth a’i chenhadaeth, a’n rhan ninnau ynddi. Mae’r Sulgwyn uwchben pob dim yn ein hatgoffa ni nad sefydliad a grëwyd gan ddychymyg dyn mo’r eglwys, ond sefydliad a ddaeth i fodolaeth trwy weithrediad Duw a’i rodd o’r Ysbryd Glân yng nghalonnau’r rhai sy’n cydnabod ac yn ymddiried yn Iesu yn Arglwydd. Neu yng ngeiriau eraill; yr Ysbryd Glân yw’r cariad sy’n llifo o fynwes Duw, trwy Grist ac sy’n treiddio i mewn i’n calonnau ni, ac yn ein creu yn un corff. Dyma’r eglwys yn ei hanfod. Yr Ysbryd Glân yw anadl yr Eglwys, yr Ysbryd Glân yw bywyd yr eglwys a’r un sydd yn ei bywiocáu ar draws y canrifoedd. A heddiw, ar ben blwydd yr eglwys, mae’n parhau i beri loes, mae’n parhau i beri hiraeth imi, fel i chwithau dwi’n siŵr, nad ydym yn gallu cwrdd gyda’n gilydd, fel eglwys i gyd-addoli. Dyma bellach y drydedd o brif wyliau’r eglwys lle na fu modd i ni ddod at ein gilydd: y Pasg, y Dyrchafael a nawr y Sulgwyn. Ond yn rhyfedd iawn, er ein bod ar wahân, yn defnyddio’r podlediadau hyn i helpu ni i addoli ar ein haelwydydd ein hunain, ac yn gwrando arnynt ar amserau gwahanol i’n gilydd, eto cawn y teimlad, er ein bod ar wahân – eto – yr ydym yn rhan o’r un eglwys, yn rhan o’r un gymdeithas, yn rhan o’r teulu. Er yr arwahanrwydd eto y teimlwn drwy’r addoliad ein bod yn agos at ein gilydd, a dwi’n argyhoeddedig mai gwaith yr Ysbryd Glân yw hwn, yr Ysbryd Glân sydd yn ein huno ni i gyd, trwy Grist yng nghariad Duw. Dyma rym sydd y tu hwnt i’n deall ni, y goruwchnaturiol, y dwyfol sydd ar waith yn ein plith, ac ynom ni. Dyma rym bywyd yr Iesu atgyfodedig ynom ni. Y grym sy’n cysuro, y grym sy’n cyfnerthu, y grym sy’n cynhyrfu, y grym sy’n rhoi gobaith, a’r gobaith yn troi’n angerdd yn ein calonnau a thân yn ein boliau! Er bod drws adeilad yr eglwys, fel eglwysi ar draws y wlad yn parhau yng nglo, eto mae’r eglwys ei hun yn fyw ac yn iach. Yn llyfr yr Actau cawn ddarlun byw a nerthol o’r Ysbryd Glân ar waith ym mywydau’r disgyblion, a genedigaeth yr eglwys ynghanol cyffro, cynnwyf a chythrwfl y Sulgwyn cyntaf. Ond fe gawn ddarlun arall hefyd o’r Ysbryd Glân yn cael ei roi i’r disgyblion, a hynny yn ein darlleniad o efengyl Ioan. Yma yn yr efengyl, cawn yr Iesu atgyfodedig ar y Pasg cyntaf, yn dod at ei ddisgyblion, tu ôl i ddrysau caeedig, ac yn ei dynerwch yn llefaru geiriau o dangnefedd iddynt, cyn anadlu arnynt, a dweud, “Derbyniwch yr Ysbryd Glân”. Trwy gydol efengyl Ioan, mae Iesu dro ar ôl tro, yn addo y byddai’n anfon un arall, y Diddanydd, Ysbryd y Gwirionedd i fod gyda’r disgyblion ar ôl ei ymadawiad. Ac yma ar ddiwedd yr efengyl, ar ôl ei Atgyfodiad a chyn ei Ddyrchafael, fe welwn ni Iesu ei hun yn rhoi’r Ysbryd Glân iddynt, fel yr addawodd. Yn ei roi er mwyn i iddynt gael parhau yn y weinidogaeth a ddechreuodd efe. Nid dechrau gweinidogaeth newydd a wnaeth y disgyblion wedi iddynt dderbyn yr Ysbryd Glân, ond parhau yn y gwaith a ddechreuodd Iesu. Nid yn eu nerth eu hunain, ond yn nerth a nodded Duw. Ac mae’r geiriau “anadlodd arnynt” yn mynd â ni’n syth yn ôl i ddechrau’r Beibl, i lyfr Genesis, pan gymerodd Duw lwch y ddaear a’i lunio’n ddyn, “ac anadlodd yn ei ffroenau anadl einioes; a daeth y dyn yn greadur byw”. Duw a roddodd fywyd i ddyn. Yn yr un modd, fe alwodd Iesu rai i’w ganlyn ef, ac yn ystod ei weinidogaeth ddaearol, fe luniodd Iesu hwy, gan eu troi o fod yn bysgotwyr i fod yn bysgotwyr ddynion, yn eu dysgu, a’u cymhwyso yn ei ddysgeidiaeth – ac ar ddiwedd efengyl Ioan fe anadlodd arnynt yr Ysbryd Glân, gan roi iddynt fywyd newydd, a daethant yn greadigaeth newydd, sef yr eglwys. Y disgyblion hyn, mor amherffaith, mor ddynol, mor ffaeledig eu ffyrdd, a sigledig eu ffydd, eto iddynt hwy, fel i ninnau y mae gwaith Crist wedi’i drosglwyddo. Fe welwn ac fe gyflawnwn ei waith bob tro y mae cariad yn trechu casineb, bob tro mae maddeuant yn trechu cam, a bob tro y mae gobaith yn egino ynghanol tywyllwch anobaith a siom. Ni allwn garu, a maddau a gobeithio fel y gwnaeth Crist, ni allwn gyflawni gwaith yr efengyl yn ein nerth ein hunain; mae’n amhosibl! Dyna pam mae angen yr Ysbryd Glân arnom, i’n tywys a’n harwain, ein cyfnerthu a’n cymhwyso, ein dihuno o unrhyw gwsg ysbrydol, a’n llenwi â chariad Crist i fod yn eglwys fyw heddiw, sy’n cyhoeddi’n hyderus ein gobaith i’r dyfodol oherwydd ein ffydd yn Nuw, fel y gwelwn yng ngwaith a pherson Iesu Grist. Beth a ddechreuodd fel anadl dyner o enau’r Iesu yn efengyl Ioan ar Sul y Pasg a drodd bumdeg diwrnod yn ddiweddarach, wedi’r Dyrchafael ac ar y Pentecost yn “wynt grymus yn rhuthro”. Yr Ysbryd Glân a roddodd hyder i’r disgyblion “gyhoeddi mawr weithredodd Duw” i bobloedd o bedwar ban byd, a phob un yn “eu clywed yn llefaru yn ei iaith ei hun”. A dyma ni’n gweld mae iaith fyd-eang yw cariad, y cariad dwyfol a ddaw atom o fynwes Duw ac sydd yn ein meddiannu trwy’r Ysbryd Glân. Iaith cariad sy’n croesi ffiniau, sy’n dymchwel muriau, sy’n gorchfygu anawsterau ac sy’n creu ac yn adeiladu cymuned yr eglwys ymhob oes. Heddiw felly, ar y Sulgwyn rhyfedd hwn, a ninnau yn eglwys wasgaredig gyda phob un ohonom yn addoli ar ei aelwyd ein hun, boed i ni gofio mai’r eglwys ydym o hyd a bod yr Ysbryd Glân yn ein cadw ynghyd yn un teulu, un gymdeithas, un corff. A boed inni fod yn ymwybodol o’r Ysbryd Glân yn gweithio yn ein bywydau ni, yn unigolion ac yn eglwys yn ystod y cyfnod, fel y bydd i’r anadl dwyfol ynom, droi’n awel gref sy’n chwythu dynion a Duw ynghyd ym mhob oes. Amen. Credo’r Apostolion Credaf yn Nuw Dad Hollgyfoethog, creawdwr nef a daear. Ac yn Iesu Grist ei unig Fab ef, ein Harglwydd ni, yr hwn a gaed trwy’r Ysbryd Glân, a aned o Fair Forwyn, a ddioddefodd dan Pontius Pilat, a groeshoeliwyd, a fu farw, ac a gladdwyd. Disgynnodd i uffern. Y trydydd dydd y cyfododd o feirw, a esgynnodd i’r nefoedd, ac y mae’n eistedd ar ddeheulaw Duw Dad Hollgyfoethog; oddi yno y daw i farnu’r byw a’r meirw. Credaf yn yr Ysbryd Glân; yr Eglwys Lân Gatholig; cymun y saint; maddeuant pechodau; atgyfodiad y corff; a’r bywyd tragwyddol. Amen. Yr Ymbiliau Yng ngrym yr Ysbryd Glân a dderbyniasom drwy ras, gadewch inni weddïo. Dyro i’r Eglwys trwy’r Ysbryd Glân nerth, doethineb a barn gywir, wrth iddi geisio gwasanaethu yn ystod y cyfnod hwn â’n hadeiladau eglwysig ar gau. Fel y daeth yr Ysbryd yn nerthol ar y disgyblion cyntaf, atgyfnerthfa dy bobl heddiw i fod yn dystion byw i’r holl fyd, ac i ufuddhau i’th orchymyn i garu’r rhai sy’n ceisio dy ddilyn di mewn gwirionedd. Arglwydd, yn dy drugaredd, Gwrando ein gweddi. Mewn byd lle ceir siarad heb gyfathrebu a pherthynas heb gariad, a lle mae ffiniau hil a chenedl yn gwahanu pobl rhag ei gilydd. Gweddïwn ar i ti anfon dy Ysbryd Glân i ddangos i’r ddynoliaeth beth yw gwir anghenion a dyheadau eu calonnau ac i’w dysgu i gyd-fyw heb ofn ac mewn brawdgarwch a’u gilydd. Arglwydd, yn dy drugaredd, Gwrando ein gweddi. Dyro inni farn gywir yn ein teuluoedd, yn ein hymwneud â’n cyfeillion ac yn ein gwaith. Bydded i ni deimlo dy bresenoldeb di ym mhob sefyllfa, yn ein hofnau, yn ein hansicrwydd, yn ein hunigrwydd, yn ein hanniddigrwydd, a’n penbleth. Dyro inni ras i adlewyrchu dy gariad yn ein gofal am y rhai y rhannwn ein bywydau â hwy. Arglwydd, yn dy drugaredd, Gwrando ein gweddi. Cysura a nertha bawb sy’n dioddef mewn corff, meddwl neu Ysbryd, a thros bawb sy’n gofalu amdanynt, enwedig meddygon, nyrys a gofalwyr mewn ysbytai, cartrefi preswyl a nyrsio ein gwlad, a thros bawb sy’n gofalu yn y gymuned. Arglwydd, yn dy drugaredd, Gwrando ein gweddi. Gweddïwn dros y rhai sydd yn llawenhau yn awr yn y wybodaeth berffaith a’r weledigaeth ddigwmwl a ddaw o fod yn nes atat ti. Bydded i ni sydd yn dy adnabod ac yn dy addoli’n di’n amherffaith ar y llawr ddod yn y diwedd i’r un goleuni tragwyddol. Arglwydd, yn dy drugaredd, Gwrando ein gweddi. Boed i Ysbryd y Pentecost anadlu arnom, fel y gallwn dystio i’r byd am y cysur, yr ystyr a’r cariad sydd gennyt ti i’w gynnig trwy Iesu Grist ein Harglwydd. Amen. Iesu roes addewid hyfryd Cyn ei fynd i ben ei daith, Yr anfonai ef ei Ysbryd I roi bywyd yn ei waith; Dawn yr Ysbryd, Digon i’r disgyblion yw. Cofiodd Iesu ei addewid, A chyflawnodd hi yn awr; Ar y Sulgwyn daeth yr Ysbryd, Ac achubwyd tyrfa fawr: Enw’r Iesu Gaiff yr holl ogoniant mwy. Mae digonedd cyflawn eto Yn yr hen addewid wiw; Boed i ninnau’n awr weddïo Am ymweliad Ysbryd Duw: O tywellter Ef yn helaeth arnom ni. O Lân Ysbryd yr addewid, Tyred yn dy ddawn di-lyth, Mae dy ras yn ddigyfnewid, Gweithia’n rymus yn ein plith; Deffro’r Eglwys, Achub, argyhoedda’r byd. Roger Edwards, Yr Wyddgrug Emynau’r Llan 120 Cymun Ysbrydol Iesu, Waredwr y byd, diolchwn i ti am adael inni yn y sacrament rhyfeddol hwn goffâd o’th ddioddefaint: caniatâ inni felly barchu dirgeleddau sanctaidd dy gorff a’th waed fel y profwn ynom ein hunain ac egluro yn ein bywydau ffrwyth dy gariad achubol di; oherwydd yr wyt yn fyw ac yn teyrnasu, yn awr ac am byth. Amen. Yr hanes Sefydlu Swper yr Arglwydd yn ôl Efengyl Matthew: 26:26-29 Ac wrth iddynt fwyta, cymerodd Iesu fara, ac wedi bendithio fe'i torrodd a'i roi i'r disgyblion, a dywedodd, "Cymerwch, bwytewch; hwn yw fy nghorff." A chymerodd gwpan, ac wedi diolch fe'i rhoddodd iddynt gan ddweud, "Yfwch ohono, bawb, oherwydd hwn yw fy ngwaed i, gwaed y cyfamod, a dywelltir dros lawer er maddeuant pechodau. 'Rwy'n dweud wrthych nad yfaf o hyn allan o hwn, ffrwyth y winwydden, hyd y dydd hwnnw pan yfaf ef yn newydd gyda chwi yn nheyrnas fy Nhad." Fel y dysgodd ein Hiachawdwr ni, gweddïwn yn hyderus: Ein Tad, yr hwn wyt yn y nefoedd, sancteiddier dy enw, deled dy deyrnas, gwneler dy ewyllys; megis yn y nef, felly ar y ddaear hefyd. Dyro i ni heddiw ein bara beunyddiol a maddau i ni ein dyledion, fel y maddeuwn ninnau i’n dyledwyr. Ac nac arwain ni i brofedigaeth; eithr gwared ni rhag drwg. Canys eiddot ti yw’r deyrnas, a’r gallu, a’r gogoniant, yn oes oesoedd. Amen. Cymerer ennyd i fyfyrio ar y Cymun Bendigaid ac ar orchymyn Crist “Gwnewch hyn er cof amdanaf”. O Wynfydedig Arglwydd, mewn undod â’th bobl ffyddlon ledled y byd, gerbron pob allor yn dy Eglwys lle dethlir yr Ewcharist, dymunwn offrymu iti fawl a diolch. Cyflwynaf i ti fy enaid a’m corff gan daer ewyllysio bod yn un â thi’n wastadol. Am na allaf yn awr dy dderbyn yn y Sacrament, tyrd yn ysbrydol i’m calon. Gwnaf fy hun yn un â thi, cofleidiaf di â chalon, meddwl ac enaid. Na foed fyth i ddim dy wahanu di oddi wrthyf; fel y gallaf fyw a marw yn dy gariad. Amen Anima Cristi Enaid Crist, sancteiddia fi. Gorff Crist, achub fi. Waed Crist, adnewydda fi. Ddŵr o ystlys Crist, golch fi. Ddioddefaint Crist, nertha fi. Iesu da, clyw fi. Yn dy glwyfau, cuddia fi. Na ad fy ngwahanu oddi wrthyt ti. Rhag y gelyn maleisus, amddiffyn fi. Yn awr angau, galw fi, A gwahodd fi atat ti, Fel, gyda’th saint, y molaf fi, Hyd byth ac yn dragywydd. Amen Trefn gwasanaeth o Gweddi Ddyddiol 2009 (sy’n cynnwys Trefn Gwasanaethau Ychwanegol y rhoddwyd iddynt y teitl Boreol a Hwyrol Weddi 2009) a awdurdodwyd gan Gorff Llywodraethol yr Eglwys yng Nghymru Hawlfraint Cyhoeddiadau’r Eglwys yng Nghymru a Chorff Cynrychiolwyr yr Eglwys yng Nghymru 2010. Testun allan o Gair yr Arglwydd 2011 – yr Eglwys yng Nghymru Hawlfraint Cyhoeddiadau’r Eglwys yng Nghymru 2011. Colectau a Gweddïau Ôl-Gymun o’r llyfr Y Calendr Newydd a’r Colectau. Hawlfraint Corff Cynrychiolwyr yr Eglwys yng Nghymru 2003 Emynau – Caneuon Ffydd, Emynau’r Llan Ein Stori Lawen
Yr ydym yn Eglwys Blwyf Gymraeg yng nghanol y ddinas ac yr ydym wedi bod yn rhan o fywyd, bwrlwm a thwf Caerdydd am dros ganrif a hanner.
Our Joyful Story We are a Parish Church in the city Centre and we have been a part of the life, bustle and growth of Cardiff for over 150 years. We welcome visitors of all nationalities and denominations to Eglwys Dewi Sant. Please make yourself known to us and do sign the visitors’ book. If you are learning Welsh, you will find the bilingual service books very useful. You may also wish to practise your Welsh after the service over coffee in the Church Hall. Os am ragor o wybodaeth am Eglwys Dewi Sant: Ficer/Vicar: Y Parchedig Dyfrig C. Lloyd Ffôn: 029 2056 6001 E-bost: dyfriglloyd@hotmail.com Y Parchedig Rhian Linecar (Offeiriad) Ffôn: 01446 760 007 E-bost: rlinecar@gmail.com Y Wardeniaid/Churchwardens: Wyn Mears - Ffôn: 029 20758726 E-bost: wyn@wynmears.com Gwynn Matthews – Ffôn: 029 2089 1802 E-bost: m.g.derwendeg@gmail.com Cyfarwyddwr Cerdd: Ieuan Jones, B. Mus - Ffôn: 074 29 012781 E-bost: ieuanjones@hotmail.co.uk Trysorydd: Rhys Jones - Ffôn: 029 2056 3834 neu 077 94 897328 E-bost: rhys.helen.jones@btinternet.com Ysgrifennydd Cymorth Rhodd: Graham Carson - Ffôn: 029 2069 1860 Ysgrifennydd Cyngor Plwyf: Marian Fairclough - Ffôn: 029 2088 5151 E-bost: faircloughmarian@gmail.com HYSBYSFWRDD YN Y NEUADD Mae nifer o eitemau newydd yn cael eu gosod ar yr hysbysfwrdd yn wythnosol. Felly, rydym yn annog pawb i gymryd amser i edrych ar yr hysbysfwrdd yn rheolaidd. |
